काठमाडौं, साउन १६ । नेपाल कराते महासंघले १३औँ सागका लागि टिम कुमुतेतर्फ पहिलो चरणको खेलाडी छनोट आज सम्पन्न गरेको छ । सातदोवाटोस्थित कराते कभर्डहलमा भएको पहिलो चरणमा २४ पुरुष र १० महिला खेलाडी छनोट भएका हुन् ।
पुरुषतर्फ बिनोश शाक्य, लेखनाथ मैनाली, सुमन श्रेष्ठ, मुकुन्द्र महर्जन, बिनोद महर्जन, राजेन्द्र कार्की, राम लिम्बु, आशिष थापा, डिगम्बर पन्त, विजय लामा, विप्लब श्रेष्ठ, शेखर श्रेष्ठ, सुशिल पौड्याल र विरबहादुर रनेनी रहेका छन् । त्यस्तै, महिलातर्फ विभुषा थापा, अमृता शाक्य, सुनिता महर्जन, कृपा शेर्पा, सुष्मिता वाईवा, रोजिता ढुंगेल, बिनिता श्रेष्ठ, पुजा पुलामी मगर, जिन सुब्बा र सरिता श्रेष्ठ छनोट हुन सफल भएको राष्ट्रिय रेफ्रि संयोजक राजेन्द्र कपालीले जानकारी गराए ।
पुराना तथा साग पदकधारी खेलाडीहरु अमृता शाक्य, बिनोद शाक्य, बिनोद महर्जन र राम लिम्बुले टिममा पुनः पुनरागमन गरेका छन् । करातेको टिम कुमुतेमा पुरुषतर्फ सात र महिलातर्फ पाँच खेलाडीहरुको सहभागिता रहने छ । पहिलो चरणमा पुरुष तर्फ ३५ खेलाडीमा २९ खेलाडीले प्रतिस्पर्धा गरेका थिए । छ खेलाडी तौल नमिलेका कारण प्रतिस्पर्धा गर्नबाट बन्चित भए ।
त्यस्तै, महिलातर्फ १० खेलाडी छनोट गर्नु पर्नेमा १२ खेलाडीमा दुई खेलाडी तौलका कारण प्रतिस्पर्धाबाट बाहिरेपश्चात १० खेलाडीमात्र रहेकाले पहिलो चरणको लागि स्वतः छनोट हुन सफल भएको रेफ्रि संयोजक कपालीले जानकारी गराए । नेपाल कराते महासंघका महासचिव हरिशरण केसीको सभापतित्वमा भएको छनोट प्रतियोगिताको प्रमुख अतिथि राखेपका पूर्व कोषाध्यक्ष एवं अन्तर्राष्ट्रिय निर्णायक मिनकृष्ण महर्जनले कराते खेलाडीहरुले आठौं सागमा राखेको साखलाई १३औँ सागमा पुनः कायम गर्नेमा आफू विस्वस्त रहेको बताए ।
-1731995984.jpg)
